As Cores do Outono chega á súa undécima edición o 27 de setembro

O Concello da Pobra do Brollón presentou o martes 19 de agosto o cartel da undécima edición do festival As Cores do Outono, que terá lugar o sábado 27 de setembro na área recreativa de Samugueiros. O anuncio fíxose coa presenza do alcalde, Xosé Lois Maceda, a concelleira de Cultura, Marián Martínez, e a deputada Iria Castro. O programa inclúe tres propostas que combinan tradición e innovación: Carmela, Lideira e Xabier Díaz & Adufeiras do Salitre. Díaz, cunha traxectoria de máis de tres décadas, ofrecerá un concerto marcado polo baile. Carmela, integrado por Carme López, Camille Hedouin e Sara Méndez, propón unha fusión de tradición oral e sons contemporáneos. Pola súa banda, Lideira, con Lois Prado, Gabi Reboredo e Sara Méndez, presenta unha proposta singular baseada en voces, percusión e ventos. Os concertos comezarán ás 21:00 horas e incluirán tamén postos de artesanía, bebida e comida. Antes, celebrarase un obradoiro de baile tradicional dirixido por Gabi Reboredo.•