As Festas Patronais de Chantada, celebradas do 21 ao 26 de agosto en honra á Virxe do Carme, pecháronse cun balance moi positivo por parte do goberno local. O alcalde, Manuel Lorenzo Varela, cualificou esta edición como “o mellor ano de asistencia de público”, asegurando que nunca se vira tanta xente na vila nin nas actividades principais, como a Festa da Empanada. “Saíu todo extraordinariamente ben, felicitei ao concelleiro de Cultura e a todo o persoal do Concello que colaborou no bo desenvolvemento das Festas porque saíron redondas”, afirmou.
O rexedor incidiu tamén na importancia que estes días tiveron para a proxección exterior de Chantada. Xa en xullo, segundo sinalou, se notara un incremento notable de visitantes, pero durante as Patronais a afluencia foi especialmente elevada. “Nunca vira tanta xente en Chantada e todo o mundo falando marabillas. Chantada é un polo de atracción turística, cada vez nos visitan máis e nos coñece máis xente”, declarou.
Varela puxo como exemplos de elementos que chamaron a atención do público o paseo fluvial, a zona antiga da vila, os balcóns engalanados, o Folión de Carros e a contorna da Ribeira Sacra. O alcalde insistiu en que a boa acollida das festas reforza a imaxe de Chantada como destino cultural e turístico, e agradeceu a implicación da veciñanza e do persoal municipal.•
Cargando ...
