En xullo asinouse un convenio entre varios concellos de Ourense e Lugo, entre eles Chantada, e a compañía Driza Green Partners, vinculada a diferentes proxectos eólicos en tramitación. O acordo prevé que unha parte dos beneficios se destine a melloras locais en caso de execución dos parques, actualmente pendentes de autorización estatal.
Esta pasada semana o grupo municipal Por Chantada, integrado na plataforma Interior Galego Vivo (IGV), fixo público o contido do documento asinado polo alcalde o pasado 14 de maio coas empresas Tipuana Wind SL e Seyal Wind SL, promotoras dos proxectos Agratrina e Agromaces. IGV, que xa presentara alegacións contra os macroparques, considera que o convenio confirma as súas advertencias e supón unha cesión de intereses municipais ás compañías enerxéticas.
Entre os puntos máis cuestionados pola agrupación destacan a sinatura sen paso previo por Pleno nin comunicación á Xunta de Goberno, unha duración de 30 anos, a inclusión dunha cláusula de confidencialidade de 35 anos e unhas porcentaxes de beneficios consideradas “testemuñais”: 2,5 % nos primeiros cinco anos, 1,5 % ata o décimo e só 1 % até o trixésimo. Para IGV, estas condicións converten o pacto nun negocio favorable ás promotoras e nunha “hipoteca” para o concello. O grupo tamén acusa ao goberno local de ter gardado silencio cando o Ministerio solicitou informe sobre a súa posición, o que interpretan como un aval implícito ao proxecto. “O alcalde debe dimitir. Ou ben asinou por desleixo e incompetencia, ou terá que explicar as razóns para aceptar condicións tan lesivas para Chantada”, sosteñen desde IGV.
O Bloque Nacionalista Galego amosou tamén o seu rexeitamento ao acordo e denunciou a falta de transparencia no proceso. O responsábel local en Chantada e deputado autonómico Iago Suárez advertiu de que o proxecto coñecido como Peol-913 AC “ameaza os montes do municipio” e criticou que se asinasen convenios “de costas á veciñanza”. O tamén deputado Xosé Manuel Golpe, especialista en enerxía, engadiu que se trata dun conxunto de cinco parques que afectan a 19 concellos, e puxo o foco na estrutura societaria das promotoras, “empresas de recente creación con escaso capital social”. Para o BNG, a iniciativa responde a un modelo especulativo e opaco que pode hipotecar o futuro económico da comarca. Os nacionalistas anunciaron que presentarán iniciativas tanto no Parlamento galego como no Congreso para esixir información e transparencia.
Pola súa parte, o alcalde Manuel Lorenzo Varela defendeu a legalidade do procedemento e explicou que a sinatura non implica a autorización dos parques, que depende do Estado. O rexedor subliña que o obxectivo é garantir que, se os proxectos se executan, Chantada obteña beneficios sociais adicionais ademais dos ingresos fiscais. “O convenio é independente da tramitación administrativa dos parques. En caso de que se aproben, permitiría que Chantada recibise beneficios adicionais”, asegurou.
Varela insistiu en que a Alcaldía ten competencias para subscribir este tipo de convenios e negou que se fixese nada ás agachadas. “Non é un convenio para facer o parque, iso non depende do Concello. O que buscamos é que, se finalmente se constrúe, o pobo de Chantada poida percibir melloras”, afirmou.•
Cargando ...
