A subdelegada do Goberno en Lugo, Isabel Rodríguez, presentou a campaña “Non camiñas soa”, unha iniciativa que busca garantir un Camiño de Santiago libre de violencias machistas. O acto contou coa presenza do alcalde, Claudio Garrido, da xefa da Unidade contra a Violencia sobre a Muller, María Luisa Castro, así como de representantes das forzas de seguridade e do concello. O programa, promovido polas unidades contra a violencia de xénero das comunidades polas que discorren as rutas xacobeas, pretende reforzar a protección das peregrinas, facilitando información, contactos de emerxencia e recursos de apoio. Acampaña abrangue 377 puntos na provincia, con carteis e tarxetas en español e inglés. En Sarria o material está dispoñible no posto da Garda Civil, na Policía Local, en cinco farmacias, 29 albergues, dúas oficinas de turismo e no centro de saúde. As tarxetas inclúen teléfonos de contacto, referencias á aplicación AlertCops e un código QR con acceso a recursos do Ministerio de Igualdade. Rodríguez salientou que en 2024 as mulleres representaron o 53 % dos peregrinos, con 254.677 camiñantes, polo que “esta realidade reforza a necesidade de iniciativas como esta”. A subdelegada agradeceu a implicación de corpos de seguridade, sanitarios e responsables de albergues, “puntos de referencia clave para transmitir mensaxes de prevención e apoio”.•
Cargando ...
