A IV Festa da Vendima de O Saviñao reuniu a veciños, visitantes e produtores na Devesa de Escairón, un espazo natural que serviu de escenario á celebración da tradición vitivinícola e agroalimentaria da Ribeira Sacra. Na inauguración participaron autoridades locais e autonómicas, entre elas o conselleiro de Cultura, Lingua e Xuventude, José López Campos que salientou o valor deste tipo de celebracións para dar visibilidade á riqueza cultural e natural da Ribeira Sacra e reforzar a súa candidatura a Patrimonio Mundial. Con todo, o protagonismo recaeu nos produtores, artesáns e artistas que fixeron posible que os asistentes vivisen experiencias auténticas ligadas á tradición e á creatividade local.
As actividades enogastronómicas incluíron catas de viños da Denominación de Orixe Ribeira Sacra, e degustacións de produtos amparados por selos de calidade, como a IXP Tenreira Galega.
A programación completouse con espectáculos musicais que combinaron tradición e modernidade, creando un ambiente festivo que permitiu descubrir a cultura da Ribeira Sacra desde diferentes perspectivas.
Tamén tivo un papel destacado a artesanía, coa colaboración da Fundación Artesanía de Galicia por segundo ano consecutivo. A entidade organizou obradoiros gratuítos abertos a todos os públicos, entre eles o de iniciación ao torno cerámico impartido por Carlos San Claudio, así como sesións de gyotaku e de cianotipias, un procedemento fotográfico que emprega a luz solar para crear imaxes en azul prusiano, dirixidos por María José Martínez e José Antonio Carrera, de Peixesapop.•
Cargando ...
