A empresa prevé xerar 34 empregos directos e máis de 500 indirectos na explotación forestal, cun proxecto baseado na economía circular
O Concello de Monforte acolleu o pasado luns a presentación oficial do proxecto de implantación de HMD Timber na Área Loxística e Intermodal do Porto Seco. O anuncio foi realizado polo alcalde, José Tomé Roca, acompañado polo representante da compañía, Manuel Díaz Pavón.
A iniciativa contempla a construción dunha planta de serradoiro, fabricación de envases e embalaxes, ademais de comercio de madeira e derivados, nunha superficie total de 90.957 metros cadrados.
A empresa, de carácter familiar e con sede social en Monforte, conta con experiencia no sector forestal e formula un proxecto que busca consolidar presenza tanto no mercado nacional como no internacional. Segundo avanzou o rexedor, a firma apostará pola economía circular e a eficiencia enerxética, transformando o piñeiro das especies pinaster e radiata, moi presentes en Galicia, en táboas serradas, palets e outros produtos.
A operación foi posible tras os contactos iniciais de HMD Timber con Xestur e o IGAPE, así como a remisión ao Concello dun informe de viabilidade urbanística solicitado pola Secretaría Xeral de Industria. Posteriormente, o 15 de setembro, a Xunta de Goberno local autorizou o traslado de información urbanística á empresa sobre catro parcelas situadas na Mazá C do Porto Seco, destinadas a edificación illada.
O proxecto contempla unha inversión total de 29,5 millóns de euros, dos que 16 millóns corresponden a fondos propios da empresa. A previsión é que a futura planta xere 34 empregos directos e máis de 500 indirectos relacionados coas tarefas de corta e transporte de madeira en diferentes puntos do territorio. Para garantir actividade a longo prazo, HMD Timber asinou xa acordos de subministración de 200.000 toneladas métricas anuais de madeira durante quince anos con compañías galegas como Maderas Vilapol S.A. e Maderera de Cospeito S.L., ademais de contar co apoio de produtores locais.
A dispoñibilidade da plataforma ferroviaria do Porto Seco constitúe un dos principais atractivos para a empresa. Segundo destacou o alcalde, a situación permitirá cargar directamente os produtos finais en tren e envialos a portos galegos ou outros destinos, reducindo custos e favorecendo un transporte sostible e menos contaminante.
O proxecto incorpora ademais certificacións de xestión forestal sostible e de custodia, que garanten a trazabilidade da madeira empregada.
Outro elemento que inflúe na elección de Monforte é a condición de “Concello Emprendedor”, que supón beneficios fiscais e bonificacións na adquisición de terreos para aquelas empresas que decidan instalarse no municipio. O rexedor lembrou tamén os avances acadados nos últimos anos na ampliación e modernización do Polígono do Reboredo, que serven de referencia para a estratexia de atraer actividade ao Porto Seco.
Na súa intervención, Manuel Díaz Pavón puxo en valor a traxectoria de HMD Timber e a importancia dunha xestión sostible do monte, incidindo no papel que esta práctica pode desempeñar na prevención de incendios forestais. Tamén avanzou que o proxecto está á espera da declaración de Proxecto Empresarial Estratéxico por parte da Xunta de Galicia, un paso necesario para comezar a súa execución.
A previsión inicial é que as obras de construción da planta dean comezo na primavera de 2026.
O proxecto presentado busca aproveitar de forma integral a madeira e modernizar a cadea de transformación forestal en Galicia, ligando a actividade produtiva coa loxística ferroviaria e co mercado internacional.•
Cargando ...
