A vaga de incendios que arrasou Galicia a finais de agosto en concellos como Quiroga e A Pobra do Brollón, e que se repetiu días atrás en Sober e Pantón, volveu situar no primeiro plano a política de prevención e loita contra o lume. A portavoz nacional do BNG, Ana Pontón, visitou as zonas máis afectadas e cualificou os lumes como unha “auténtica catástrofe ambiental, social e económica”. Na súa intervención avanzou que a formación nacionalista reclamará responsabilidades ao Goberno de Alfonso Rueda e urxiu a creación dunha comisión de investigación no Parlamento galego para analizar os fallos na xestión.
Pontón puxo sobre a mesa máis de medio cento de medidas recollidas no plan integral “Da cinza á vida”. Entre elas, a ampliación a 100 metros das franxas de protección arredor de vivendas e núcleos, para o que pediu un fondo extraordinario da Xunta. Defendeu tamén unha nova ordenación forestal baseada en mosaico, con menor presenza de especies pirófitas e maior diversificación de usos do monte.
A líder do Bloque reclamou incrementar as axudas para vivendas afectadas até os 200.000 euros, habilitar unha liña de 6.000 euros para autónomos e recoñecer o lucro cesante nas explotacións. Considerou insuficientes as medidas aprobadas polo Executivo autonómico e acusou ao PP de ter desmantelado nos últimos 16 anos políticas clave na loita contra o lume, deixando incluso sen executar 11 millóns en prevención.•
Cargando ...
