A oferta inclúe cursos de idiomas, accións en dixitalización e especialización en restauración en colaboración co INGAVI
Turismo de Galicia puxo en marcha o Plan de Formación 2025 do Centro Superior de Hostalería de Galicia (CSHG), orientado a reforzar a competitividade do sector turístico. A programación abrangue cursos de idiomas, accións en transformación dixital e actividades presenciais de especialización en restauración e bebidas.
A oferta en idiomas inclúe cursos de francés, italiano e alemán de nivel principiante (A1) e portugués de nivel elemental (A2), todos cunha duración de 75 horas, 100 prazas dispoñibles e inicio o 29 de setembro. Tamén se convocan 12 niveis de inglés específico para o sector turístico, con 100 prazas, que arrancarán o 7 de outubro. O prazo de inscrición remata o 24 de setembro.
No ámbito dixital, o plan contempla un ciclo de cinco webinars titulados Novidades IA, tendencias e ferramentas que marcan o futuro da xestión turística, previstos entre setembro e novembro con 100 prazas. Engádese o videocurso O poder da IA para transformar o turismo en Galicia, de 150 horas e inscrición aberta ata abril de 2026 con prazas ilimitadas.
A programación complétase cunha colaboración co Instituto Galego do Viño (INGAVI), prevista para o último trimestre do ano. Inclúe 80 prazas repartidas en catro propostas presenciais: os cursos de Coctelería e Gastronomía Líquida e de Xestión e Dirección de Sala, ambos de 24 horas, xunto coas MasterClass “Gin Tonics perfectos” e “Que viño elixir para o Nadal”.•
Cargando ...
