A Academia de Cine escolleu a pasada semana Sirât, dirixida polo cineasta galego Oliver Laxe, como candidata española á 98 edición dos Premios Oscar. O anuncio fíxoo público Pablo Berger, acompañado polo presidente da institución, Fernando Méndez-Leite, e a notaria Eva Fernández Medina, nun acto celebrado o mércores en Madrid.
A película, o cuarto longa de Laxe e gañadora do Premio do Xurado no Festival de Cannes, está protagonizada por Sergi López e sitúa a acción nunha rave no deserto, en plena serra do sur de Marrocos. O filme contará agora cun percorrido internacional á espera de coñecer o 16 de decembro a shortlist de aspirantes ao galardón, data na que se decidirá se continúa na carreira pola estatuíña. As nominacións finais faranse públicas o 22 de xaneiro de 2026 e a gala terá lugar o 15 de marzo en Los Ángeles.
Laxe, que interveu por vía telemática, agradeceu o apoio dos académicos e subliñou que afronta o reto con ilusión. Pola súa parte, os produtores Agustín Almodóvar, Esther García e Xavi Font reclamaron apoio dos profesionais españois da Academia de Hollywood e avanzaron que a campaña de promoción incluirá pases internacionais para dar visibilidade á obra. •
Cargando ...
