O Concello de Quiroga recibirá preto de 250.000 euros da Deputación de Lugo para financiar distintas actuacións no municipio. O acordo formalizouse no Pazo de San Marcos co presidente provincial, José Tomé Roca, e o alcalde, José Luís Rivera Castro. As inversións previstas suman case 300.000 euros e inclúen a rexeneración dos accesos a núcleos de Espandariz, Caspedro e San Pedro, así como a mellora do local social de Margaride.
A dotación permitirá tamén a adquisición dun camión para a recollida de lixo, servizo que actualmente dispón dun único vehículo para cubrir 317 quilómetros cadrados, 22 parroquias e 123 entidades de poboación.
Ademais, os fondos financiarán a segunda edición dun programa de actividades lúdicas coas que se prevén máis de 340 prazas. A iniciativa inclúe rutas de sendeirismo, barranquismo, parapente e visitas guiadas, co obxectivo de dar a coñecer o patrimonio do municipio e fomentar o seu aproveitamento cultural e recreativo.
O presidente da Deputación de Lugo, José Tomé Roca, destacou que a colaboración coas administracións locais busca achegar dotacións e servizos ao medio rural sen considerar as cores políticas, enmarcando esta acción dentro da cooperación transversal que caracteriza a actividade do goberno provincial.•
Cargando ...
