O encontro, celebrado na Estación Científica do Courel, reuniu durante tres días expertos e entidades para analizar novas vías de desenvolvemento económico respectuoso coa natureza
A Estación Científica do Courel acolleu do 2 ao 4 de outubro as Xornadas Técnicas “Ecoturismo en Ancares-Courel: experiencias e reflexións para o desenvolvemento rural”, un encontro que reuniu a preto dunha vintena de especialistas, representantes institucionais e entidades locais co obxectivo de avanzar nun modelo turístico sostible que favoreza o desenvolvemento do interior lucense.
A deputada de Réxime Interior, Promoción do Territorio e Turismo da Deputación de Lugo, Pilar García Porto, participou no acto inaugural o foro destacando que “o turismo é unha ferramenta estratéxica para o desenvolvemento da provincia”. Subliñou, ademais, a importancia de impulsar unha actividade turística “respectuosa co medio, xeradora de emprego e que contribúa a fixar poboación no rural”.
Durante as tres xornadas desenvolvéronse mesas de debate, dinámicas participativas e visitas guiadas que combinaron a reflexión científica coa práctica turística. Abordáronse cuestións como a valorización dos recursos locais, a creación de experiencias auténticas e o aproveitamento sostible da paisaxe. Entre as actividades destacaron unha ruta polo Souto da Ruibal e unha experiencia micolóxica centrada na biodiversidade dos soutos.
O encontro celebrado no Courel formou parte do proxecto CAPRIF-CC (Comunidades Activas e Paisaxes Resilientes a Incendios Forestais e Cambio Climático), impulsado por diversas fundacións galegas e apoiado pola Fundación Biodiversidade do MITECO dentro do Plan de Recuperación financiado pola Unión Europea.•
Cargando ...
