O Concello de Monforte iniciou os traballos para deseñar un plan de acción municipal vinculado á Axenda 2030, a folla de ruta aprobada pola ONU que fixa os Obxectivos de Desenvolvemento Sostible (ODS). Esta axenda, de carácter universal, compromete a todos os países na loita contra a pobreza, o cambio climático e a desigualdade, promovendo tamén a igualdade de xénero, o acceso á educación e á sanidade e a protección do medio ambiente.
Segundo explicou José Tomé, a adhesión a este marco permitirá aliñar as políticas públicas locais cos principios do desenvolvemento sostible e mellorar a planificación estratéxica municipal. O rexedor destacou que esta iniciativa favorecerá a participación cidadá e abrirá novas vías de financiamento autonómico, estatal e europeo. “Con esta iniciativa, amosamos un firme compromiso coa igualdade, a inclusión social e a loita contra o cambio climático”, afirmou.
Como punto de partida, o Concello levará a cabo un diagnóstico inicial para identificar programas e proxectos municipais xa coherentes cos ODS, determinar o seu grao de implantación e definir áreas prioritarias de actuación. A partir desta análise, redactarase un plan de acción local que incorporará eixos estratéxicos, metas concretas e mecanismos de avaliación.
O proxecto completarase cunha campaña de difusión dirixida tanto ao persoal técnico municipal como ao alumnado de Secundaria, co obxectivo de dar a coñecer a Axenda 2030 e fomentar o seu cumprimento a nivel local.•
Cargando ...
