A FP medra con forza no sur de Lugo, cun 8% máis de alumnado este curso

O conselleiro de Educación destacou en Monforte o avance das ensinanzas técnicas e anunciou a ampliación do IES A Pinguela para responder á crecente demanda

A área educativa que abrangue Lemos, Chantada e Quiroga consolidouse este curso 2025-2026 como o principal foco de crecemento da Formación Profesional en Galicia. Con 846 persoas matriculadas, o incremento do alumnado ascendeu ao 8,18% respecto ao ano anterior, unha cifra que supera amplamente a media galega. Así o destacou o conselleiro de Educación, Ciencia, Universidades e FP, Román Rodríguez, durante a súa visita aos institutos IES A Pinguela e IES Francisco Daviña Rey de Monforte de Lemos.
O titular de Educación subliñou que o modelo galego de FP segue a reforzarse cun enfoque “moderno, innovador e adaptado ás necesidades de cada territorio”. En conxunto, Galicia suma este curso 71.229 estudantes nestas ensinanzas, un 3,5% máis que en 2024. Na provincia de Lugo a cifra ronda as 7.300 matrículas, o que supón un incremento do 4%, mentres que a zona sur, encabezada por Monforte, é a que experimenta unha evolución máis destacada.

«Unha Formación profesional moderna e innovadora, pegada aos intereses e demandas de cada territorio”

O crecemento está vinculado, en boa medida, á implantación de novos itinerarios formativos de alta especialización. No IES A Pinguela destaca o ciclo de grao medio en Confección de moda, así como a oferta parcial en Calzado e complementos de moda. Tamén se imparten estudos de Sistemas de telecomunicacións e informáticos e unha oferta parcial en Sistemas electrónicos e automatizados. Pola súa banda, o IES Daviña Rey consolidou os seus másteres de grao superior en Ciberseguridade en contornos das tecnoloxías da operación e en Sistemas de sinalización e telecomunicacións ferroviarias, dous programas con alta demanda e proxección laboral.
Segundo Román Rodríguez, estes resultados reflicten a estratexia da Xunta para potenciar a FP como “piar esencial do tecido produtivo galego”, mediante a incorporación de modalidades máis prácticas e tecnoloxicamente avanzadas. O conselleiro incidiu en que o obxectivo é “favorecer a empregabilidade xuvenil e reforzar a conexión entre centros educativos e empresas do entorno”.
Durante a visita, anunciou tamén que a Consellería redactará o próximo ano o proxecto de ampliación do IES A Pinguela, co propósito de dotar o centro de novas instalacións adaptadas ao crecemento da súa oferta formativa.
Esta actuación completarase con outras intervencións realizadas recentemente en Monforte, como a rehabilitación integral do IES Francisco Daviña Rey, na que se investiron 1,4 millóns de euros.
O conselleiro Román Rodríguez, explicou que a intención é que os centros educativos do sur de Lugo se convertan nun referente de innovación e cualificación profesional.•