A Fundación Barrié impulsa a sexta edición das bolsas de investigación para universitarios galegos

A Fundación Barrié abriu a convocatoria da sexta edición do Summer Undergraduate Fellowship Program, dirixido a universitarios galegos das áreas das Ciencias da Vida que queiran realizar prácticas de investigación durante o verán de 2026. O programa concederá ata quince bolsas para estadías en institucións académicas de prestixio internacional.
As prácticas terán lugar no University College London, nas súas divisións de Medicina e de Infeccións e Inmunidade; no Louisiana State University Health Sciences Center; no Massachusetts General Hospital e na Michigan State University. As bolsas están destinadas a estudantes con nacionalidade española e vinculación con Galicia, matriculados no curso 2025-2026 en titulacións como Medicina, Bioloxía, Bioquímica, Biotecnoloxía, Enxeñaría Biomédica, Xenética, Microbioloxía, Farmacia, Neurociencia, Bioinformática, Veterinaria ou Ciencias Biomédicas.
Durante a estadía, os participantes integraranse en proxectos de investigación reais e traballarán baixo a supervisión dun mentor, en laboratorios dotados con equipamento de vangarda. A dotación cobre gastos de viaxe, visado, seguro médico, manutención e taxas de exame de inglés. Os antigos bolseiros colaboran na selección de proxectos e fortalecen a rede internacional de investigadores vinculados a Galicia.•