A Asociación Veciñal do Saviñao denuncia deficiencias no servizo de Monbus

A Asociación Veciñal do Saviñao vén de trasladar as queixas da veciñanza polo funcionamento do servizo que Monbus presta no municipio. Entre os principais problemas, sinalan a falta de puntualidade e a información incorrecta sobre os horarios publicados na web da compañía. Segundo denuncian, “os horarios intermedios non se axustan á realidade” e as persoas usuarias deben chegar ás paradas con moita antelación para evitar perder o autobús.
Outra das incidencias máis recorrentes é a saturación de viaxeiros. A asociación asegura que, nos últimos meses, moitas persoas víronse obrigadas a viaxar de pé durante traxectos de máis de media hora, o que consideran unha situación “inadmisible”. Tamén critican a falta de flexibilidade do servizo en casos puntuais, como o dun viaxeiro ao que se lle prohibiu subir por levar unha maleta supostamente superior aos 30 quilos permitidos, sen comprobar o seu peso.
O colectivo lembra que as liñas interurbanas son concesións públicas e deben cumprir uns mínimos de calidade, puntualidade e seguridade. Por iso, instan ás administracións competentes a intervir, “pois o transporte público é un dereito básico que non pode verse supeditado aos intereses económicos dunha empresa privada”.•