A Confederación Hidrográfica Miño-Sil (CHMS) e as universidades da Coruña e de Salamanca colaboran nun estudo que permitirá avaliar o estado do túnel romano de Montefurado, en Quiroga, co obxectivo de garantir a súa conservación. O acordo, asinado polo presidente da CHMS, José Antonio Quiroga, e os reitores Ricardo Cao e Juan Manuel Corchado, supón un investimento de 320.334 euros a cargo do organismo dependente do Ministerio para a Transición Ecolóxica.
O traballo técnico abranguerá tanto a análise da estabilidade e resistencia dos materiais do túnel e do macizo rochoso como o estudo das condicións hidrodinámicas do río Sil. “Obterase información científico-técnica que permitirá avaliar o comportamento da estrutura e definir medidas de conservación axeitadas”, indicou Quiroga.
A Universidade da Coruña asumirá a modelización hidráulica do túnel e do leito do río, mentres que a de Salamanca realizará o estudo xeolóxico-xeotécnico do macizo. Estes datos permitirán deseñar solucións para garantir a seguridade da obra.
O túnel, datado nos séculos I e II, é un dos vestixios máis representativos da minería romana no noroeste peninsular. Tras o derrubo de 1934, conserva 54 dos 150 metros orixinais e canaliza hoxe todo o caudal do Sil, o que provocou o asolagamento do antigo meandro e a perda das súas funcións ambientais.•
Cargando ...
