O Concello de Quiroga presentou esta semana a sexta edición do QuiMedo, unha das citas máis multitudinarias do Samaín en Galicia, que desenvolverá o seu percorrido de terror o sábado 25 de outubro. O evento pechou o prazo de inscricións ao acadar o límite de 1.200 prazas, quedando un pequeno número dispoñible o mesmo día da actividade. O itinerario, que percorre o casco urbano de Quiroga e Pacios de Mondelo, inclúe oito casas temáticas ambientadas e máis dun cento de voluntarios caracterizados para provocar medo entre o público. Entre as propostas desta edición figuran “A Monxa”, “O Espantallo”, “O taller da morte”, “Piratas 2”, “O Inferno”, “O último de Nós”, “Mac Guarro” e “Survival. O Labirinto”. O pavillón municipal será o punto de encontro, con apertura ás 19.00 horas para a recollida de pulseiras e actividades infantís. O percorrido iniciarase ás 21.30 e prolongarase durante tres horas, seguindo un mapa que evitará aglomeracións. A xornada rematará coa festa Horror Night, amenizada polo DJ Pablo da Disco Móbil Dolce Vita. Dende a organización agradecen a colaboración do Concello e dos veciños que fan posible esta experiencia.•
Cargando ...
