A Xunta de Galicia reforzará o próximo ano o apoio aos polos de emprendemento e apoio ao emprego da provincia de Lugo, entre eles os de Monforte de Lemos e Sarria, cun investimento global que rolda os 650.000 euros. Estes centros, creados hai tres anos, converteron o sur da provincia nun referente na dinamización empresarial e na creación de novas oportunidades laborais no medio rural.
Os deputados autonómicos do PPdeG Raquel Arias e José Manuel Mato destacaron, durante unha visita á área de autocaravanas de Sober —un proxecto impulsado co acompañamento técnico do polo de Monforte—, que estas instalacións “son unha ferramenta clave para apoiar as persoas con ideas de negocio e facilitarlles o camiño para que poidan levalas á práctica”.
Desde a súa posta en marcha, os cinco polos lucenses (Monforte, Sarria, Friol, Mondoñedo e A Fonsagrada) atenderon máis de 1.100 proxectos, dos cales preto de 800 seguen activos. Case un millar de persoas emprendedoras recorreron a estes espazos para recibir asesoramento e apoio, sendo mulleres o 56% das participantes.
Os datos tamén reflicten unha ampla presenza de persoas de entre 30 e 55 anos, un segmento clave para o mantemento da actividade económica no territorio. En total, realizáronse máis de 3.400 sesións de titoría.
En canto aos sectores, o peso maioritario correspóndese coa hostalería, cun 20% dos proxectos, seguido do comercio (16%) e os servizos (12%).
Estes espazos ofrecen información sobre oportunidades de negocio, apoio técnico personalizado, formación e axudas.•
Cargando ...
