O protagonista do Día da Ilustración 2026 será Siro López, coñecido artisticamente como Siro. A elección recoñece a unha das figuras máis relevantes do humor gráfico e da caricatura política en Galicia, cunha ampla traxectoria que abrangue tamén o retrato, a pintura e o ensaio. A conmemoración celebrarase o 30 de xaneiro, data que lembra o nacemento de Castelao e que forma parte do Calendario do Libro e da Lectura impulsado pola Consellería de Cultura, Lingua e Xuventude.
Esta é a segunda ocasión na que o homenaxeado está en vida, unha decisión que permite dar valor e visibilidade a quen segue a contribuír activamente á cultura galega. A Xunta prepara para os próximos meses un programa de actividades arredor da obra de Siro, con exposicións e obradoiros que afondarán no seu labor artístico e no seu papel dentro do xornalismo e da creación literaria. Nado en Ferrol en 1943, Siro amosou desde neno unha especial aptitude para o debuxo e dominou técnicas moi diversas, desde a tinta e o grafito ata o pastel ou os medios dixitais. Ademais de colaborar en numerosos medios de comunicación, é autor do deseño da Praza do Humor da Coruña e do curso de galego Imos aló?, emitido pola Televisión de Galicia entre 1989 e 1990. Deste modo, o Día da Ilustración 2026 servirá para poñer en valor unha carreira esencial na cultura visual galega contemporánea.•
Cargando ...
