A Xunta continúa a dar pasos decisivos na tramitación da candidatura da Ribeira Sacra como Patrimonio Mundial, un proceso que entrará na súa fase final a comezos de 2026. A semana pasada, unha delegación da Consellería de Cultura, Lingua e Xuventude, acompañada por representantes do Ministerio de Cultura, desprazouse a París para manter unha reunión de traballo cun comité de expertos da Unesco. O encontro buscou revisar e aclarar aspectos do expediente presentado en xaneiro, así como afondar nas valoracións emitidas polo observador de Icomos que visitou o territorio durante o outono.
Ao remate da xuntanza, o director xeral de Patrimonio Cultural, Ángel Miramontes, afirmou que “as sensacións seguen a ser moi boas e fan confiar na consecución desta distinción en 2026”. Miramontes explicou que a delegación galega insistiu nos elementos que sustentan a proposta Ribeira Sacra: Paisaxe da auga, un territorio que abrangue 26 concellos de Lugo e Ourense cun modelo de uso da auga quec“non está suficientemente representado na Lista de Patrimonio Mundial”.
Lembrou que o observador internacional puido coñecer sobre o terreo a singularidade da paisaxe cultural candidata, unha información que se sumou aos informes xa presentados. “Agora correspóndenos ampliar e matizar estes contidos cara á documentación definitiva, que deberá entregarse antes do 27 de febreiro de 2026”, apuntou. O director xeral subliñou que cada avance é “crucial” de cara á decisión final prevista para o segundo semestre do próximo ano e agradeceu o apoio do Ministerio de Cultura, así como da veciñanza, entidades e institucións locais implicadas.
A delegación tamén puxo en valor o investimento realizado pola Xunta na última década para reforzar a protección do patrimonio da zona. Segundo detallou Miramontes, preto de 8 millóns de euros permitiron desenvolver máis de 90 actuacións en bens arquitectónicos e arqueolóxicos, entre eles igrexas, mosteiros, castros ou xacementos romanos. “Co esforzo conxunto, a Ribeira Sacra é hoxe un territorio máis vivo e máis coidado, e confiamos en que o recoñecemento internacional contribúa a reforzar aínda máis esta traxectoria”, concluíu.•
Cargando ...
