O alcalde de Monforte de Lemos, José Tomé Roca, presentou o pasado xoves o proxecto de orzamentos municipais para 2026, unhas contas que, segundo indicou, son “os máis sociais da historia” e que superan os 18 millóns de euros.
A proposta, elaborada polo executivo local e presentada xunto á concelleira de Facenda, Gloria Prada, foi debatida e aprobada no pleno do 24 de novembro para a súa entrada en vigor en xaneiro.
Tomé salientou que o documento mantén conxeladas as taxas por undécimo ano consecutivo e recolle un incremento do 3,49% nos ingresos, apoiado principalmente na participación nos tributos estatais. O rexedor destacou tamén o peso das políticas sociais, cun reforzo do Servizo de Axuda no Fogar e do programa Xantar na Casa, así como o aumento de partidas para conciliación, gardería e actividades culturais. En materia de investimentos, reserváronse fondos para a EDAR do Reboredo, a Ronda Urbana e actuacións vinculadas á creación de emprego.
CRÍTICAS DO PARTIDO POPULAR
O Grupo Municipal do PP realizou a súa primeira valoración dos orzamentos presentados polo alcalde de Monforte para 2026. A portavoz, Katy Varela, afirmou que as contas manteñen “o continuísmo de sempre” e que non incorporan un proxecto claro para a cidade. Criticou, ademais, a previsión de 650.000 euros en sancións e o peso dos gastos correntes. Sobre os investimentos, Varela asegurou que son “moi limitados” e que non abordan problemas clave como abastecemento ou saneamento.•
Cargando ...
