Foto GPRSN.
O Centro do Viño da Ribeira Sacra acolleu o I Foro de Emprego da comarca, unha iniciativa promovida por Ribeira Sacra Next xunto a diversas entidades sociais. Preto de corenta representantes do tecido empresarial e social participaron nun encontro orientado a identificar problemas laborais e a establecer mecanismos de colaboración.Entre as principais conclusións, destacouse a escaseza de man de obra e a necesidade de ligar a procura de emprego co acceso á vivenda e coa formación. As entidades defenderon crear unha figura que dea seguridade xurídica ás persoas propietarias e elaborar un mapa de necesidades formativas que conecte os perfís profesionais que demandan as empresas coa oferta existente.
O Foro puxo o foco tamén na importancia de manter unha comunicación estable entre empresas e persoas demandantes. Neste sentido, presentouse o novo portal de emprego impulsado pola asociación, cualificado polos asistentes como a primeira ferramenta desta natureza na comarca. O xerente, David Diéguez, explicou que a plataforma “vai medrando progresivamente” e que xa facilitou varias contratacións.
A sesión contou coa participación de representantes da Xunta e do empresariado, ademais das organizacións colaboradoras Acción contra el Hambre, Albores, Cáritas, Igaxes, Provivienda e a Fundación Belarmino Fernández.•
Cargando ...
