A dirección provincial do PSdeG celebrou en Monforte unha nova reunión coas agrupacións da comarca de Lemos para analizar o momento político e preparar o traballo dos vindeiros meses. No encontro participaron representantes dos nove concellos da zona, nunha xuntanza centrada na coordinación territorial e na planificación electoral. O secretario xeral provincial, José Tomé, avanzou que o partido presentará listas en todos os municipios “con equipos preparados e proxectos serios para responder ás necesidades reais da cidadanía”.
A dirección destacou o papel de Monforte como segunda cidade da provincia e subliñou os avances que se están a impulsar desde diferentes administracións, entre eles as actuacións ferroviarias e os investimentos da Deputación en servizos básicos. Para a dirección socialista, estas accións “contribúen a dinamizar a comarca e a consolidar o seu peso dentro da provincia”.
Tomé advertiu, con todo, de que estes progresos “topan cos límites dun Goberno galego instalado na parálise”, e lembrou que continúan pendentes proxectos estratéxicos da Xunta, como o Porto Seco. Referiuse tamén á falta de apoio ao sector primario e ao vitivinícola, sinalando que a Ribeira Sacra “merece unha aposta turística seria e estable”.•
Cargando ...
