O documental O Son da Serra, Cando O Courel derramou bágoas de cinsa foi presentado esta fin de semana en Folgoso do Courel ante veciñanza e protagonistas do maior incendio vivido en Galicia ata agosto de 2025. A obra, dirixida por Ana Belén Fernández e Paulino Rodríguez, con fotografía de Emilio Romanos e banda sonora de Ale González, reconstrúe o lume que arrasou case 13.000 hectáreas en xullo de 2022, afectando aos concellos de Folgoso, A Pobra do Brollón e Quiroga e obrigando a evacuar máis de mil persoas. A través de entrevistas gravadas desde aqueles días, recolle emocións e medos, xunto a imaxes cedidas polo servizo de extinción. O proxecto pretende deixar constancia histórica, sensibilizar sobre a importancia de coidar este territorio e informar sobre os riscos dos incendios convectivos. Tras o pase, anunciouse a súa difusión en festivais e centros educativos para promover conciencia ambiental e protocolos de prevención. Ademais, os responsables subliñaron que este traballo é tamén unha homenaxe ás persoas que loitaron contra o lume e ás que, malia a destrución, seguen apostando por manter viva a riqueza natural e cultural da serra.•
Cargando ...
