A última edición dos Premios Galicia 2024-2025 da Arquitectura Técnica volveu poñer o foco no patrimonio rural, cun recoñecemento especial para un proxecto desenvolvido en Pantón. O Consello Galego da Arquitectura Técnica entregou os galardóns no acto de graduación da EUATAC, nun encontro que reuniu profesorado, alumnado e responsables dos colexios profesionais.
O segundo premio foi para o estudante Pablo Feijóo González pola rehabilitación da antiga bodega da Casa da Fonte, en Ferreira de Pantón. O inmoble, construído en pedra e ligado durante décadas ás tarefas agrícolas dunha casa solariega restaurada en 2015, conserva un escudo de 1756 na entrada principal. A proposta recupera o edificio respectando os materiais tradicionais e o contorno, con actuacións destinadas a garantir estabilidade e uso funcional. Feijóo tamén recibiu o recoñecemento ao mellor expediente académico da súa promoción.
O primeiro premio recaeu nun traballo centrado en Parada de Sil, mentres que dous accésits recaeron en proxectos de rehabilitación en Vimianzo e Coristanco. O xurado destacou a calidade das propostas e o compromiso coa recuperación do patrimonio construído en concellos rurais afastados das áreas urbanas.
Durante o acto, representantes do Consello Galego da Arquitectura Técnica subliñaron a importancia da profesión na Galicia do futuro e valoran o esforzo das novas xeracións. A arquitecta técnica Carolina Meira Montana pronunciou unha conferencia sobre innovación no sector, e o presidente do Consello, Carlos Mato Méndez, animou o alumnado a encarar a súa etapa profesional con “ilusión e especialización” ante os retos tecnolóxicos que vive o sector.•
Cargando ...
