Ana Pontón sitúa no PSOE a responsabilidade de aclarar o caso e defende o apoio ás mulleres que denuncian
A portavoz nacional do BNG, Ana Pontón, reiterou que José Tomé debe abandonar todas as súas responsabilidades institucionais tras as acusacións de acoso sexual coñecidas nos últimos días.
Pontón reafirmou tamén o compromiso do BNG co apoio ás mulleres vítimas de violencia machista e destacou a importancia de acompañar a quen decide denunciar, especialmente cando o presunto agresor ocupa unha posición de poder. Advertiu de que dar ese paso non é doado e defendeu que as organizacións políticas deben situarse sempre ao lado das vítimas, con independencia da súa cor política.
Pola súa parte, dende o BNG de Monforte expresaron a súa preocupación pola situación política e institucional aberta. Para os nacionalistas, a gravidade das informacións coñecidas sitúa á cidade nun escenario de especial delicadeza que require respostas claras e coherentes.
Desde o Bloque lembran que, sen prexuízo da presunción de inocencia, existen principios básicos de responsabilidade pública que deben rexer a actuación de calquera cargo electo. Nese sentido, consideran politicamente incomprensible que Tomé renunciase á Presidencia da Deputación de Lugo e, ao mesmo tempo, pretenda continuar á fronte da Alcaldía de Monforte. O BNG subliña que o propio rexedor reclamou dimisións inmediatas noutros casos similares, polo que entende que a coherencia institucional non pode aplicarse de maneira selectiva.
A formación nacionalista amosa tamén a súa inquietude pola decisión do grupo municipal socialista de manter o apoio a Tomé, mesmo tras causar baixa no propio partido. Ao seu xuízo, esta postura transmite unha mensaxe contraditoria á cidadanía, xa que resulta incompatible defender publicamente ás vítimas e, á vez, soster politicamente a quen evita asumir responsabilidades.
En relación co anuncio de Esperta Monforte sobre unha posible moción de censura, o Bloque cualifícaa de inviable ao non existir maioría suficiente e considera que esa vía suporía descargar de responsabilidade ao goberno municipal.
A formación non descarta estudar outros mecanismos, pero insiste en que calquera decisión se adoptará con responsabilidade. •
Cargando ...
