A directora xeral de Administración Local, Natalia Prieto, visitou Bóveda para coñecer o proxecto Punto Deporte Río Mao, que transformará a contorna do río nun espazo de referencia para o deporte e o lecer activo. A iniciativa, impulsada polo Concello co apoio da Xunta, contará cun investimento autonómico superior aos 284.000 euros, a metade do orzamento total. O plan inclúe a creación dunha piscina natural, circuíto de pump track, rocódromo, parque infantil de iniciación á escalada e pistas de volei-praia e pádel. “Este proxecto facilita a práctica deportiva e pon en valor o patrimonio natural, dinamizando turismo e economía local”, destacou Prieto. Ademais, subliñou que esta liña de axudas busca impulsar actuacións que transcenden o ámbito municipal e fomentan sectores como o deporte, o turismo e o medio ambiente. Este ano financian 19 iniciativas en Galicia cun total de 8,5 millóns de euros, e para 2026 prevese aumentar a dotación ata os 10 millóns.•
Cargando ...
