O PSdeG-PSOE afronta unha das súas semanas máis delicadas tras coñecerse as denuncias por presunto acoso sexual que derivaron na dimisión de José Tomé como presidente da Deputación de Lugo e na súa suspensión de militancia. Nun contexto de forte impacto político e social, a formación socialista celebrou unha reunión do seu Grupo de Igualdade na sede nacional, convocada pola secretaria de Organización, Lara Méndez, e pola, ata ese momento, responsable de Igualdade, Silvia Fraga, na que se aprobou un manifesto para reforzar as garantías internas e os procedementos fronte a condutas machistas.
Antes dese encontro, Méndez xa avanzara tras a Xunta de Portavoces do Parlamento que as informacións coñecidas “non só producen tristeza, senón repugnancia”, e anunciou un pronunciamento “contundente” por parte do partido. Na reunión do Grupo de Igualdade, as participantes acordaron un documento que reclama máis transparencia, prazos claros, medidas cautelares proporcionadas e canles seguras de denuncia, así como acompañamento psicolóxico e xurídico ás vítimas. O manifesto subliña que os feitos coñecidos “non son episodios illados”, senón expresión de dinámicas de poder arraigadas, e amosa apoio a todas as mulleres que sufran comportamentos machistas, tanto dentro como fóra do partido.
Logo da aprobación do texto, Lara Méndez defendeu que o PSdeG “é o partido que máis avanzou na defensa da igualdade” e lembrou que foi pioneiro na creación dun canal interno antiacoso. Nesa mesma liña, instou ao resto das forzas políticas a dotarse de ferramentas similares que garantan protección efectiva e contornas seguras.
Pero esta unanimidade no partido, non durou moito tempo, a crise política tivo tamén consecuencias orgánicas. A secretaria de Igualdade do PSdeG presentou a súa dimisión por discrepancias coa cúpula dos socialistas galegos no xeito de tratar o escándalo do acoso sexual que salpicou ao presidente da Deputación de Lugo, José Tomé. Cumpre lembrar que Tomé, que negou publicamente os feitos e asegurou que “como acoso sexual, seguro que non”, deixou a Deputación pero mantén a alcaldía de Monforte de Lemos. Pola súa banda, Besteiro recoñeceu que tiña coñecemento indirecto das acusacións desde outubro, explicou que pediu explicacións ao afectado, Tomé Roca —que as negou— e lembrou que a lei esixe denuncia da persoa agraviada para proceder.
Nunha comparecencia tras a Executiva, o líder socialista trasladou “todo o apoio, afecto e solidariedade” ás vítimas e asegurou que, unha vez rexistrada unha denuncia formal esta semana, o partido actuou “en horas, con rapidez e contundencia”. Ademais, anunciou a proposta dunha xestora para a provincia de Lugo, como parte dunha resposta que o PSdeG quere centrar nos feitos e no reforzo dos seus mecanismos internos de igualdade. A día do peche desta información, a xestora xa está constituida, encabezado polo veterano Luis Ángel Lago Lage como presidente.
MANIFESTOS CRÍTICOS
En paralelo, o PSdeG-PSOE afronta unha nova tensión interna pola difusión do manifesto Polo feminismo no PSdeG-PSOE, subscrito por arredor de 170 mulleres socialistas, entre elas a alcaldesa da Coruña, Inés Rey. O texto critica a xestión da denuncia interna por presunto acoso sexual ao ex presidente da Deputación de Lugo, José Tomé, e expresa o apoio explícito á ex secretaria de Igualdade, Silvia Fraga, que deixou o cargo por discrepancias coa dirección.
As asinantes advirten de que “non ten cabida ningunha actuación que ampare ou relativice o acoso sexual e o machismo” e reclaman esclarecer os feitos, protexer ás vítimas e garantir unha resposta “firme, transparente e coherente”. O manifesto recoñece o dano reputacional causado ao partido e expresa “estupor e vergoña” polo sucedido, ao tempo que defende a dimisión de Fraga como “un acto de compromiso feminista” e reclama tolerancia cero fronte a calquera forma de violencia contra as mulleres.
A crise aberta polo caso Tomé non se pechou aínda. Pola contra, destapou unha fractura interna que pon en cuestión a coherencia entre o discurso feminista do PSdeG e a súa resposta cando as acusacións afectan a cargos propios. Ao manifesto inicial sumouse outro texto máis contundente, que reclama responsabilidades políticas e sinala directamente á dirección galega. Figuras históricas do socialistmo galego admiten erros na xestión, mentres a presión medra desde a militancia e se esixen medidas máis claras.
Neste escenario, destaca a proxección de Inés Rey, alcaldesa da Coruña, que se converteu nunha das voces máis firmes en defensa dunha resposta feminista, reforzando o seu perfil interno nun momento de posible debilitamento de Besteiro. A crise chega nun contexto complexo para o PSOE, sen recuperar a Xunta desde 2009, e o desenlace pode marcar tanto o futuro orgánico do socialismo galego como a súa capacidade para reconstruír unha alternativa sólida fronte ao PP.•
Cargando ...
