O Concello de Monforte aprobou en sesión plenaria extraordinaria o traspaso da Unidade Asistencial de Drogodependencias (UAD) ao Servizo Galego de Saúde, no marco do acordo alcanzado na Comisión Mixta Xunta-Fegamp. A decisión permite que este recurso pase a depender directamente do Sergas, dando resposta a unha demanda compartida por trece concellos galegos que viñan asumindo competencias sanitarias impropias.
No caso de Monforte, a UAD municipal presta atención non só á veciñanza do municipio, senón tamén a usuarios doutros concellos do sur da provincia de Lugo e da comarca de Valdeorras, na provincia de Ourense. A unidade atende así unha ampla área territorial, consolidándose como un servizo de referencia no ámbito da atención ás drogodependencias.
O acordo aprobado contempla o traspaso íntegro dos servizos, do persoal e dos medios materiais. A UAD conta actualmente con catro traballadores con praza fixa —directora-enfermeira, educadora, traballadora social e auxiliar administrativo— ademais dunha psicóloga interina, así como tres postos vacantes incluídos no proceso. A integración garante a continuidade asistencial e a estabilidade laboral do persoal.
Tamén se inclúe no traspaso a cesión do contrato de arrendamento do local situado na Praza da Estación, propiedade de ADIF, que pasará a ser xestionado polo Sergas. Desde o Concello salientan que esta medida permite reforzar a coordinación sanitaria e asegurar a prestación do servizo dentro do sistema público galego de saúde.•
Cargando ...
