O Partido Popular de Lugo elevou o ton das súas críticas ao PSOE e ao BNG tras a difusión de novas informacións sobre os presuntos casos de acoso sexual atribuídos a José Tomé e o coñecemento previo das denuncias por parte de responsables socialistas. Os populares consideran que a situación continúa sen aclararse e que o mantemento do silencio está a provocar un grave deterioro da imaxe das institucións provinciais.
O voceiro do PP na Deputación, Antonio Ameijide, cualificou de “inaceptable” que, días despois de coñecerse os feitos, non se produciran explicacións públicas nin a asunción de responsabilidades. Sinalou de maneira directa á secretaria de organización do PSOE lucense, deputada provincial e alcaldesa de Antas de Ulla, Pilar García Porto, á que acusou de permanecer “agochada” pese á gravidade das informacións coñecidas. Segundo Ameijide, “debe saír de inmediato a explicar por que gardou silencio durante todo este tempo” e asumir as consecuencias políticas que se deriven.
O dirixente popular advertiu de que a falta de respostas está a agravar a crise institucional na Deputación, onde José Tomé continúa exercendo responsabilidades. Ao seu xuízo, manter a actividade política “como se nada tivese pasado” contribúe a normalizar unha situación que considera insostible e prexudicial para a credibilidade da institución.
Na mesma liña expresouse a presidenta provincial do PP, Elena Candia, que trasladou publicamente o seu apoio ás presuntas vítimas e manifestou a súa repulsa ante este tipo de condutas. Candia afirmou que a situación é “grave non só polo que se denuncia, senón polo que se cala” e advertiu de que o silencio tamén debilita ás institucións. “As institucións non poden estar ao servizo de quen se aferra ao cargo”, subliñou.
Candia incidiu en que, malia o paso dos días, non houbo cambios reais, xa que Tomé mantén as súas actas e segue condicionando a vida política provincial. Tamén puxo o foco no papel do BNG, ao que definiu como actor determinante, reclamándolle que abandone a ambigüidade e se posicione con claridade. Para a presidenta popular, “non valen as medias tintas nin os silencios incómodos” cando está en xogo a defensa das vítimas e a transparencia institucional.
Tanto Ameijide como Candia coincidiron en reclamar explicacións claras ao PSOE e un posicionamento firme do BNG. Desde o PP advertiron de que seguirán esixindo responsabilidades políticas ata que se esclareza o sucedido, ao considerar que a situación actual continúa a danar a imaxe da Deputación de Lugo e da provincia no seu conxunto.•
Cargando ...
