O Concello de Pantón presentou a programación de Nadal, na que se combina unha oferta tradicional de actividades culturais con novidades pensadas para toda a familia. Entre as propostas destaca a celebración do I Mercado de Nadal, que terá lugar os días 3 e 4 de xaneiro na Praza do Concello, aínda que en caso de condicións meteorolóxicas adversas trasladarase ao Pavillón Municipal. O horario do mercado será de 11:00 a 19:00 horas, e a asignación dos postos realizarase o día 3 ás 8:00 horas. Poderán participar profesionais vinculados á artesanía, alimentación, decoración, xoguetes, antigüidades e outros produtos relacionados co espírito destas Festas. Os postos deberán contar co material necesario para a súa montaxe, mentres que o Concello facilitará servizos básicos como iluminación e seguridade durante o peche. As solicitudes deberán presentarse antes do 26 de decembro, acompañadas de memoria fotográfica do produto, copia do DNI e último recibo de autónomo. Os admitidos serán notificados por correo electrónico e mediante publicación no taboleiro municipal.
CONCURSOS DE POSTAIS DE NADAL E DE BELÉNS
Ademais do mercado, Pantón mantén os concursos habituais de Postais de Nadal e de Beléns, cuxo prazo permanecerá aberto ata o 20 de decembro, así como a exposición de macrofotografía “Comidas de Nadal” na Casa da Cultura durante todo o mes. O sábado 13 celebrouse un obradoiro infantil de Nadal, mentres que o 2 de xaneiro o Pavillón Municipal acollerá as actividades de Infantilandia de 17:00 a 20:00 horas.
A programación culminará co Festival de Reis o 5 de xaneiro na Praza do Concello, que incluirá recepción das Súas Maxestades ás 18:00 horas no salón de actos do edificio sociocultural. Desde a administración local animan á veciñanza a participar nas distintas propostas, facendo fincapé no carácter festivo, cultural e familiar das actividades, e deséxanlles unhas felices festas a todos os veciños e veciñas de Pantón.•
Cargando ...
