Quiroga prepara un Mercado de Nadal para impulsar o comercio e a artesanía locais

O Concello de Quiroga volverá celebrar o Mercado de Nadal para dinamizar o comercio de proximidade e a artesanía. A Praza de España acollerá a cita o sábado 27 e o domingo 28 de decembro, con horario de 11.00 a 14.00 e de 16.00 a 20.00, baixo unha carpa con postos e actividades para público familiar. O obxectivo é ofrecer un espazo de compra e lecer antes de Reis e reforzar a vida económica local. Participarán 16 expositores; entre eles, Etna, Xobel, Libraría Celia, Aramel, Caurelor, Riomao Estudio Creativo, Trapalladas Artesanía, Hery Cremas, Shadewolf, A Rabuda, Elgoal, Queixería Cumbres de Trevinca, Katoka Flowers, Crepería, Feito con Love e Serendipia. Para achegar os oficios á cativada haberá dous obradoiros infantís gratuítos: o sábado 27, ás 16.30, decoración con pintura en pezas impresas en 3D con motivos de Nadal; e o domingo 28, ás 16.30, elaboración de guirlandas con materiais sinxelos. Ademais, habilitarase un espazo de xogo infantil e celebrarase un sorteo dunha Cesta de Nadal ás 18.30, impulsado pola asociación de comerciantes. A programación incorpora tradición e demostracións en vivo. O Apalpador visitará Quiroga o sábado de 12.00 a 14.00 cunha ruada coincidindo coa feira de decembro e rematará na carpa contando historias. O domingo, no mesmo tramo horario, Artesanía Armaior ofrecerá unha mostra de torneado de madeira de oliveira, explicando o proceso de creación de utensilios de cociña. A música terá presenza o domingo 28 coa charanga tradicional PÁNDEGA, que realizará un pasarrúas e animará a carpa entre as 12.00 e as 14.00. O Concello procura combinar venda, divulgación e lecer nun único espazo e favorecer a participación de familias da comarca. O Mercado de Nadal está promovido polo Concello de Quiroga, co patrocinio da Vicepresidencia da Deputación de Lugo e do Centro de Artesanía e Deseño, e coa colaboración da Asociación de Empresarios e Comerciantes do Xeoparque Montañas do Courel. A iniciativa aspira a consolidarse como encontro anual para artesáns e negocios da zona, impulsando a compra responsable e o consumo de proximidade.•