O Concello de Sober anunciou que Rafa Centeno, chef do restaurante Vértigo recentemente galardoado coa primeira estrela Michelin da provincia, será o pregoeiro da XLVI Feira do Viño de Amandi, que se celebrará do 27 ao 29 de marzo de 2026. O pregón de Centeno terá lugar o domingo 29 ao mediodía e marcará un dos momentos centrais dunha feira consolidada como cita de referencia no calendario enoturístico galego.
A distinción Michelin recibida polo Vértigo supón un fito histórico para a provincia de Lugo e sitúa o enoturismo galego nun nivel nacional destacado. O delegado territorial da Xunta en Lugo, Javier Arias, visitou recentemente o restaurante para felicitar ao chef e ao seu equipo, subliñando “o proxecto culinario vinculado ao territorio, que reivindica os produtos de proximidade e destaca atributos da Ribeira Sacra como a paisaxe e a viticultura”. Arias tamén lembrou que a distinción coincide coa recta final da candidatura da Ribeira Sacra a Patrimonio Mundial da Unesco.
O alcalde de Sober, Luis Fernández Guitián, destacou que a participación de Centeno como pregoeiro reforza a relación entre gastronomía e territorio, “poñendo en valor os produtos locais e a subzona de Amandi”. Rafa Centeno, natural de Lugo e propietario do restaurante vigués Maruja Limón, reside na aldea de Francos, desde onde se achega ao restaurante e á bodega Regina Viarum, onde o Vértigo desenvolve o seu proxecto culinario.
A estrela Michelin do Vértigo non só sitúa a Lugo na ruta de restaurantes máis prestixiosos de España, senón que tamén consolida a bodega Regina Viarum como referente enoturístico do noroeste peninsular. A súa carta combina os viños locais con produtos de proximidade, nunha aposta pola identidade e a calidade que Centeno trasladará ao prego da Feira do Viño de Amandi. Con este nomeamento, a organización da feira busca subliñar a conexión entre cultura, gastronomía e patrimonio local, reforzando a relevancia da cita para a comarca e a súa proxección máis aló de Galicia.•
Cargando ...
