O Concello de Sober puxo en marcha a súa programación de Nadal, que se estenderá ata o 5 de xaneiro, día no que os Reis Magos visitarán a localidade. A proposta inclúe unha ampla oferta musical, con concertos de panxoliñas e festivais da Escola Municipal de Música, así como espectáculos de humor para adultos e actuacións do grupo Trícole. O programa comezou coa presentación do poemario de José Vicente Barcia e co mercadiño de Nadal en Bolmente. O pasado venres inaugurouse o alumeado e os beléns, incluíndo a instalación de pezas de madeira de Eugenio Linares diante da Casa do Concello e o belén do Centro Sociocultural. Ao longo das festas, celebrarase a Festa de Santa Lucía, unha festa infantil de Nadal no pavillón do CEIP Virxe do Carme e diversas actuacións itinerantes do Trícole, que percorrerá centros sociais. Ademais, durante estas datas, mantense a convocatoria dos tradicionais certames de poesía, postais, beléns e decoración de locais comerciais. O peche da programación terá lugar o 5 de xaneiro coa chegada das Súas Maxestades, acompañada de agasallos para a cativada e da entrega de premios aos gañadores dos concursos de Nadal.•
Cargando ...
