A liña, dotada inicialmente con 40 millóns de euros, busca flexibilizar e conectar a formación co mercado laboral
A nova convocatoria de Accións Formativas para persoas Desempregadas (AFD) 2026-2027 pon á disposición das entidades acreditadas un orzamento inicial de 40 millóns de euros, ampliable segundo necesidades, cunha programación deseñada para mellorar a empregabilidade e responder á demanda efectiva de talento no mercado laboral galego. O modelo incorpora cursos modulares de grao A, B e C, con opcións presenciais ou virtuais, así como microformacións de 30-40 horas que permiten adaptar a capacitación a distintos perfís profesionais.
Entre as novidades destaca a posibilidade de acceder a accións de nivel superior sen agardar a certificación da formación anterior ou a homologación de títulos estranxeiros, garantindo continuidade formativa. Cada acción debe contar cun mínimo do 30 % do alumnado comprometido previamente, asegurando a súa conexión coa realidade produtiva. Nos programas de grao C mantense a formación dual, cun 25 % do tempo en contornas laborais reais, reforzando a práctica profesional e facilitando a incorporación ao emprego.
PRAZOS
O prazo de presentación de solicitudes abrirase o 20 de xaneiro e pechará o 30 de novembro de 2026. A convocatoria permite que persoas desempregadas accedan á formación en prioridade, aínda que se poderá cubrir un 30 % das prazas con ocupadas se non se completan coas sen emprego. As entidades poderán solicitar anticipos de ata o 60 % e os proxectos contan con financiamento para adquisición, mellora de inmobles, materiais e equipamentos necesarios. Ademais, introdúcense microcredenciais que posibilitan a empresas deseñar cursos curtos e certificados á medida, e iniciativas complementarias, como Galicia Suma Talento: Emprégate, inclúen incentivos á contratación de participantes de programas previos.•
Cargando ...
