O Concello de Pantón celebrou os días 3 e 4 de xaneiro a primeira edición do Mercado de Nadal, que se instalou na contorna da Praza do Concello e do Edificio Sociocultural. Unha decena de postos ofreceron produtos variados, entre eles costura, xabóns e candeas artesanais, arxila, traballos de ganchillo, galletas, xoias, xoguetes, bolsos e papelería. Durante toda a fin de semana, en horarios de mañá e tarde, numerosos veciños e veciñas aproveitaron para recorrer os postos e participar nas actividades complementarias organizadas para o público infantil. A concelleira de Cultura, Cristina Domínguez, valorou positivamente a resposta da xente e destacou que varios expositores xa mostraron interese en repetir, “Para ser o primeiro ano o balance é moi positivo, os postos participantes falaron desde o comezo de repetir porque estaba funcionando moi ben”. O Concello tamén destacou o éxito das demais actividades da programación festiva. Destacan o tradicional Festival de Reis, que o 5 de xaneiro enchía o salón de actos do Edificio Sociocultural, e a segunda edición de Infantilandia, celebrada o 2 de xaneiro no Pavillón Municipal. Domínguez salientou a maior afluencia respecto ao ano pasado e explicou que ambas iniciativas ofrecen un ambiente máis próximo e acolledor para os nenos e nenas, mesmo para aqueles con necesidades especiais, que se atopan cómodos e disfrutan do encontro coas Súas Maxestades, “Non é a distancia dunha cabalgata, aquí están ao quentiño, é moito máis cercano”, conclúe a concelleira.•
Cargando ...
