O desdobramento entre Nadela e A Pobra de San Xiao pecha a conversión do corredor nunha vía de alta capacidade
A licitación do segundo e último tramo da autovía AG-22, que unirá Lugo con Sarria, supón un novo avance na mellora das comunicacións no sur da provincia. O proxecto céntrase no desdobramento do tramo Nadela–A Pobra de San Xiao e permitirá completar a transformación do actual corredor nunha vía de alta capacidade, chamada a converterse nun eixo clave de mobilidade interior.
As obras, cun orzamento de 37,7 millóns de euros, abranguen unha lonxitude de 13,5 quilómetros, desde a glorieta de Nadela ata o enlace da Pobra de San Xiao, xa operativo. O proceso de licitación mantense aberto ata o 30 de xaneiro e o prazo de execución está fixado en 36 meses, coa previsión de que os traballos arranquen a comezos do segundo semestre de 2026.
A actuación inclúe a construción de novas infraestruturas singulares, como os enlaces do Corgo e Maceda, un paso inferior baixo a A-54, dous viadutos sobre os ríos Chamoso e Neira, así como a ampliación de pasos superiores e inferiores existentes. O trazado contará con dúas calzadas e dous carrís por sentido, o que permitirá adiantar con maior seguridade e reducir os tempos de desprazamento.
Unha vez en servizo, a nova autovía facilitará unha conexión máis directa coa A-6 e coa A-54 no nó de Nadela, mellorando a accesibilidade da comarca de Sarria e a súa relación coa capital provincial. Calcúlase que arredor de 100.000 usuarios se verán beneficiados por este itinerario, polo que circularán a diario máis de 8.000 vehículos, incluído tráfico pesado.
A intervención enmárcase nunha planificación máis ampla de actuacións viarias, que inclúe novas variantes e a modernización de estradas autonómicas, e o reforzo das tarefas de conservación da rede existente.•
Cargando ...
