Carmela López Moreno foi proclamada hoxe presidenta da Deputación de Lugo nun pleno celebrado no Pazo de San Marcos, tras resultar a candidata con máis votos. A alcaldesa de Burela asumiu o cargo “coa responsabilidade de representar a toda a provincia e de traballar polo interese xeral das veciñas e veciños dos 67 concellos”. A elección contou co apoio do PSOE, o BNG e do deputado do grupo mixto, José Tomé, expresidente da institución, mantendo o acordo de goberno progresista existente. O Partido Popular votou ao seu propio candidato, Antonio Ameijide, sen que a súa proposta alterase o resultado.
Durante a súa intervención, López incidiu na importancia do diálogo, a accesibilidade e a empatía na política. “O diálogo non é debilidade. A accesibilidade non resta autoridade. A empatía é entender as necesidades reais da xente para poder dar respostas xustas”, subliñou. Destacou tamén que a experiencia como alcaldesa de Burela lle ensinou a gobernar con firmeza, criterio propio e capacidade de coordinación coas diferentes administracións, garantindo que as políticas cheguen a todos os recunchos da provincia. A presidenta agradeceu ás agrupacións políticas, á súa familia e ás veciñas e veciños o apoio recibido ao longo da súa traxectoria, destacando a relevancia da confianza depositada nela para asumir este cargo.
López comprometeuse a favorecer a gobernabilidade e a colaboración entre forzas políticas, impulsar proxectos que melloren a vida diaria das veciñas e veciños, e garantir unha atención equilibrada a todos os concellos. “A Deputación é o concello dos concellos, a institución que permite prestar mellores servizos á xente. Aquí falamos de persoas, de concellos, de servizos, de oportunidades para vivir e para quedar”, afirmou. A nova presidenta comprometeuse a exercer unha presidencia aberta, accesible e baseada na toma de decisións responsable, co obxectivo de avanzar na provincia de Lugo desde a proximidade, o servizo público e o reforzo das políticas de cooperación territorial.
POSICIÓN DO BNG
Dende o BNG, o Vicepresidente da Deputación, Efrén Castro, sinalou que «unha vez rematado o pleno de elección de Presidenta, dende o grupo provincial do Bloque Nacionalista Galego consideramos que cumplimos co que viñamos anunciando de traballar para devolver a normalidade a esta institución e agora ábrese un tempo de futuro para seguir modernizando a Deputación de Lugo e seguir traballando polo ben de tódolos concellos da provincia de Lugo e por todo o tecido tanto cultural como deportivo como asociativo en tódolos ámbitos e deste xeico respectar o que saliu nas urnas nas últimas votacións municipais que era un goberno de esquerdas no que tiña presenza o Bloque Nacionalista Galego, mentres o partido popular seguiu no carroñerismo político, tratando de tirar por tódolos medios ó que salira dass urnas. Felizmente non triunfou e o BNG seguirá estando do lado das vítimas, do lado das mulleres e da loita feminista, como leva facendo durante toda a súa historia».
O GRUPO POPULAR DENUNCIA O «PACTO DA VERGOÑA»
O voceiro do Grupo Provincial Popular, Antonio Ameijide, criticou a recente elección de Carmela López como presidenta da Deputación de Lugo, asegurando que esta nova etapa “nace do escándalo, manchada” por un acordo entre PSOE, BNG e o deputado non adscrito José Tomé. Ameijide sostén que a formación socialista e os nacionalistas “puxeron prezo ao feminismo e á defensa das mulleres”, facendo referencia a supostos 500.000 euros vinculados á súa aprobación.
Segundo os populares, o pacto inclúe o respaldo explícito de José Tomé, acusado de presunto acoso sexual, e de Pilar García Porto, identificada como persoa que encubriu estas condutas. Ameijide denunciou que o acordo evidencia que “PSOE e BNG elixiron máis do mesmo en lugar de promover unha limpeza de prácticas reprobables na Deputación”.
O voceiro popular cuestionou a actitude do BNG, sinalando que “escoitamos alto e claro a súa resposta: escollen os cargos antes que o feminismo e a defensa das vítimas”. Criticou tamén a ausencia de Ana Pontón no acto de toma de posesión, indicando que “asinou a partida de defunción da coherencia e do feminismo no BNG”. Ameijide insistiu en que, ao optar por manter os cargos, os nacionalistas posicionáronse “do lado do presunto acosador” e condenou a “certificación do pacto da vergoña”, advertindo que este acordo “inhabilita moralmente a ambos partidos para falar de igualdade, feminismo e dignidade”.•
Cargando ...
