A asociación veciñal do Saviñao denunciou a xestión dos residuos no concello por empregar, segundo afirma, un soar municipal da Lama como vertedoiro e escombreira. O espazo, próximo a vivendas e ao centro de saúde, acumularía desde hai máis dun ano entullos, electrodomésticos e enseres de xeito continuado, ocupando uns dous mil metros cadrados.
O colectivo sinala que empresas da construción reclaman un lugar autorizado para restos de obra ante o repunte da rehabilitación. Por iso propuxeron en varias ocasións habilitar un Punto Limpo no antigo mercado gandeiro, con peche e portal, sen éxito. Critican que o alcalde remitise á necesidade de contar con persoal específico como impedimento.
A asociación asegura que a situación incumpre a legalidade urbanística e ambiental e reclama unha solución urxente. Con esta denuncia pública, pide á Corporación habilitar un servizo regulado e poñer fin ao depósito incontrolado de residuos no casco urbano de Escairón.•
Cargando ...
