A cita gastronómica medra en aforo, estrea imaxe e contará co exdeportista Fernando Romay como pregoeiro
Sarria ultima os preparativos para a Festa do Cocido do Porco Celta, que se celebrará o 31 de xaneiro no Campo da Feira e que este ano alcanza a súa 18ª edición, convertida xa nunha das citas gastronómicas máis destacadas do inverno galego. A organización agarda reunir entre 750 e 800 comensais, unha cifra récord que obriga a ampliar o aforo e que confirma a consolidación do evento. A celebración chega tamén con nova imaxe, obra do artista sarriao Borja Doel, e cun pregoeiro moi coñecido polo público galego: Fernando Romay, quen será o encargado de abrir unha xornada que combina gastronomía, tradición e difusión do produto local. Pero o verdadeiro protagonista volverá ser o porco celta, raza autóctona criada en extensivo e moi valorada pola súa calidade. O menú incluirá sopa, chourizos, lacón, soá, butelo, grelos, patacas e garavanzos, ademais do tradicional queixo con marmelo. As 60 mesas de 13 persoas completarán o espazo dispoñible, e preto de medio cento de profesionais participarán na preparación e servizo, con máis de 1.000 quilos de carne previstos para a cocción. A festa está organizada polo Concello de Sarria e pola Asociación de Hostalaría e Turismo do Camiño de Santiago, coa colaboración de criadores e empresas locais. O evento supón cada ano un impulso económico para toda a comarca, atraendo visitantes de Galicia e doutros puntos do Estado, e reforzando a identidade gastronómica sarriá arredor dun produto que gaña prestixio edición tras edición.•
Cargando ...
