A Casa da Cultura de Quiroga acolleu unha xornada dedicada á produción de aceite de oliva virxe extra na que a conselleira do Medio Rural, María José Gómez, subliñou o compromiso da Xunta coa mellora da calidade agroalimentaria e co avance de cultivos que están a gañar peso no rural galego. Durante a inauguración do encontro, celebrado o pasado 24 de xaneiro, a responsable autonómica lembrou o crecemento das plantacións de oliveira nos últimos anos e a aparición de pequenas explotacións que apostan por variedades propias. Segundo afirmou, existen “moitas empresas familiares que apostaron pola calidade e pola recuperación de variedades autóctonas, que teñen unhas cualidades únicas”.
Gómez avanzou que o próximo período da PAC incluirá axudas específicas para estes cultivos, co obxectivo de consolidar a súa presenza e contribuír á dinamización territorial. Tamén destacou o papel das accións formativas para mellorar o coñecemento técnico e favorecer a profesionalización do sector.
Programa da xornada
O obxectivo desta iniciativa formativa en Quiroga, na que participan expertos galegos e portugueses, é afondar na elaboración deste produto na nosa comunidade, poñendo o foco nos aspectos técnicos do traballo en almazara, no control dos procesos e na profesionalización do sector como base para o seu desenvolvemento sostible no rural galego.
Así, nun contexto atlántico con características propias, a calidade do aceite de oliva virxe extra (AOVE) depende en gran medida dun manexo axeitado da almazara, do coñecemento técnico-científico e da capacidade para avaliar e mellorar o produto final. Ao longo da xornada abórdanse estes aspectos desde unha perspectiva práctica, científica e estratéxica, combinando experiencias profesionais contrastadas, coñecemento académico e análise sectorial.
Ademais, integrouse a cata de aceites como ferramenta técnica aplicada á elaboración, mentres que a proposta gastronómica final permite poñer en valor o AOVE galego como produto de calidade diferenciada e cun notábel potencial económico.•
Cargando ...
