O Bloque Nacionalista Galego celebrou en Sarria un acto aberto á veciñanza para explicar a actividade que desenvolve nas Cortes do Estado. O encontro estivo conducido pola concelleira do BNG no concello, Mónica López, e contou coa participación do deputado no Congreso Néstor Rego, que debullou as iniciativas impulsadas pola formación nacionalista con impacto en Galicia.
Durante a sesión, os representantes do BNG destacaron que a súa presenza en Madrid permite trasladar as demandas galegas ás institucións estatais. Rego centrou parte da súa intervención nas melloras en materia de infraestruturas ferroviarias, subliñando os avances na modernización e electrificación da liña entre Ourense e Lugo, así como o impulso á conexión Lugo-Santiago e ao desenvolvemento das cercanías ferroviarias.
No ámbito social, o deputado salientou o papel do BNG na actualización das pensións, especialmente das mínimas, unha cuestión relevante en territorios con rendas máis baixas. “Cada euro que sobe unha pensión mínima é unha mellora directa para milleiros de veciñas e veciños”, afirmou. Tamén puxo en valor a ampliación dos permisos de maternidade e paternidade, actualmente en 19 semanas.
No plano económico, Rego reiterou a defensa dun sistema de financiamento propio para Galiza e criticou a proposta estatal vixente.•
Cargando ...
