Sober perfila o seu Entroido cun amplo programa
de actividades. O Concello organiza un desfile, concursos e degustacións para 14 de febreiro, o
día grande da festividade
O Concello de Sober fixo público o programa co que celebrará o Entroido, que terá o seu día grande o sábado 14 de febreiro e incluirá unha nova edición do Baile da Cachucha, xa na súa maioría de idade. Como é tradición, as festas comezarán antes, co Xoves de Compadres o 5 de febreiro e o Xoves de Comadres o día 12, marcando o inicio dun ciclo festivo moi arraigado no municipio.
A xornada central do sábado arrancará ás 17.00 horas cun desfile que partirá da Praza do Concello. Nesta ocasión introdúcese un premio específico á música en directo, pensado para distinguir a quen anime o percorrido interpretando temas ao vivo. O xurado poderá ademais conceder accésits nas diferentes categorías, en función da creatividade e participación dos grupos inscritos.
A partir das 18.00 horas, o pavillón polideportivo converterase no punto de encontro das familias, cunha proposta que inclúe inchables e xogos para o público infantil. Ás 19.30 horas celebrarase o concurso de disfraces para nenos e nenas, estruturado en modalidades individual, parellas e grupos, con premios que oscilan entre os 20 e os 80 euros. Media hora despois, ás 20.00 horas, ofrecerase unha degustación gratuíta de cachucha e viño, un dos momentos máis agardados da festa.
O Concello mantén tamén o sistema de premios para comparsas, grupos e participantes individuais. As comparsas recibirán 60 euros pola súa participación e poderán optar a galardóns de entre 100 e 400 euros. Nos grupos, a achega pola presenza será de 30 euros e os premios situaranse entre 90 e 120 euros. Na categoría individual e parellas, os recoñecementos irán dos 50 aos 80 euros, ao igual, e as mesmas condicións establécense para o concurso de disfraces infantil. Con este programa, Sober reafirma a súa aposta por un Entroido participativo e aberto a todas as idades.•
Cargando ...
