Representantes políticos e do sector turístico reivindicaron na súa visita a Madrid o valor universal da Ribeira Sacra
A Ribeira Sacra presentou en FITUR unha mesa redonda institucional dedicada a reforzar a súa candidatura a Patrimonio da Humanidade. O encontro, celebrado no stand de Galicia e conducido pola xornalista Noa García, incluíu a proxección dun vídeo que repasou os valores naturais e culturais que sustentan a proposta.
O presidente do Consorcio de Turismo e alcalde de Sober, Luís Fernández Guitián, subliñou que a declaración da Unesco sería “un recoñecemento internacional a un territorio e á súa identidade”, ademais dun agradecemento ás persoas que o preservaron ao longo dos séculos. Tamén destacou que o selo permitiría atraer investimento e favorecer novas oportunidades no rural.
Na conversa abordouse a necesidade dun modelo turístico ordenado, con experiencias auténticas e unha planificación que manteña a esencia da zona. Os participantes coincidiron en que o recoñecemento axudaría a que o visitante perciba a Ribeira Sacra como unha paisaxe cultural de valor excepcional.
O acto contou coa presenza de representantes da Xunta, das deputacións e de numerosos profesionais do sector turístico, reforzando o carácter colectivo da candidatura.•
Cargando ...
