Carmela López, calificou a candidatura da Ribeira Sacra a Patrimonio Mundial como , “unha oportunidade histórica para que o mundo recoñeza o valor universal deste territorio”
A presidenta da Deputación de Lugo, Carmela López, iniciou o pasado mércores en Madrid a súa axenda institucional na Feira Internacional de Turismo (Fitur) coa presentación da candidatura da Ribeira Sacra a Patrimonio Mundial da UNESCO, nun acto celebrado no stand de Turismo de Galicia. Durante a súa intervención, apelou á cooperación entre administracións como elemento esencial para acadar este recoñecemento internacional e consolidar un modelo de desenvolvemento respectuoso co territorio.
López puxo en valor o carácter singular da Ribeira Sacra, á que definiu como “un territorio cunha identidade forte, unha beleza que emociona e un patrimonio vivo que se mantén grazas ao coidado diario da súa xente”. Subliñou tamén o papel estruturante dos ríos Miño e Sil, non só na configuración da paisaxe, senón tamén na forma de vida da comarca, ligada ao traballo da terra e a unha relación histórica co entorno. Desa interacción, explicou, xorden os viñedos de viticultura heroica, os mosteiros centenarios, os núcleos rurais con personalidade propia e un patrimonio cultural e natural de valor excepcional.
A presidenta lembrou que o expediente da candidatura xa se atopa en mans da UNESCO e que nos vindeiros meses se coñecerá a decisión definitiva, polo que cualificou o momento como unha oportunidade histórica para o recoñecemento mundial da Ribeira Sacra. Nese contexto, insistiu en que o proxecto só pode avanzar desde a colaboración leal entre a Xunta de Galicia, as deputacións e os concellos, co obxectivo común de protexer o territorio e proxectalo cara ao futuro con responsabilidade.
Durante o acto tamén salientou o compromiso da Deputación de Lugo con iniciativas que permiten coñecer a comarca dun xeito sostible, como os catamaráns fluviais, que facilitan a descuberta dos canóns desde o río e achegan a viticultura heroica aos visitantes dunha maneira respectuosa. “A grandeza da Ribeira Sacra está na súa paisaxe, no seu patrimonio e na súa cultura, pero sobre todo na súa xente, que a coida e a mantén viva cada día”, afirmou. Á presentación asistiron, entre outros, o delegado do Goberno en Galicia, Pedro Blanco Lobeiras, e o presidente do Consorcio de Turismo Ribeira Sacra, Luis Fernández Guitián.
A presenza da Deputación en Fitur inclúe unha intensa axenda de encontros profesionais e institucionais orientados a fortalecer alianzas e posicionar Lugo como referente no turismo de natureza e sostible. Neste marco, Carmela López participa tamén na difusión doutras campañas promovidas desde a provincia, como a impulsada pola Mancomunidade da Mariña baixo o lema A Mariña, unha viaxe á identidade, centrada no turismo de benestar e consciente, co protagonismo das Carolas ou Canouras como figuras pioneiras do turismo mariñán.
O venres 23 de xaneiro tivo lugar no stand de Galicia a presentación oficial da campaña Provincia de Lugo, Reserva Natural, unha iniciativa que pon o foco na riqueza ambiental da provincia e aposta por un turismo non masificado, vencellado ao territorio e á conservación dos seus recursos. O acto estivo conducido por David Vilares e contou coa participación de representantes das reservas da biosfera Terras do Miño e Os Ancares Lucenses, ademais da estrea dun audiovisual promocional que inicia un proxecto máis amplo de difusión a nivel estatal.
Á presentación asistiron tamén o alcalde de Monforte de Lemos, José Tomé Roca, e a tenente de alcalde, Gloria Prada, quen destacaron o papel do municipio como capital da Ribeira Sacra dentro deste modelo turístico. A campaña foi presentada por Carmela López xunto co cineasta Óliver Laxe, e contou coa presenza de alcaldes e alcaldesas da provincia. Na súa intervención, a presidenta provincial defendeu “un modelo de turismo de calidade, de equilibrio co territorio e de compromiso cos seus habitantes”, unha liña na que, segundo sinalou o rexedor monfortino, encaixa a aposta municipal por un turismo sostible, baseado en experiencias e na posta en valor do patrimonio natural.•
Cargando ...
