O Entroido da Pobra de Brollón volve a convocar os concursos habituais da festividade. As citas principais serán o VIII Concurso de Compadres e Comadres, previsto para os xoves 5 e 12 de febreiro, e o Concurso de Disfraces, que terá lugar o sábado 14. As inscricións para ambos eventos deberán formalizarse na Biblioteca Municipal ou por teléfono dentro do horario establecido, con datas límite que varían segundo a modalidade.
No certame de Compadres e Comadres, o Concello mantén as categorías individuais —divididas en menores e maiores de 18 anos— e a modalidade colectiva, aberta a comercios, asociacións e outros grupos. Os premios oscilarán entre os 20 e os 100 euros, segundo a categoría. As figuras individuais que participen na queima organizada deberán concentrarse diante da Casa Consistorial ás 18.30 horas, mentres que quen non acuda a ese acto terá que enviar unha fotografía acreditativa para que o xurado poida avaliar a proposta. No caso dos colectivos, as creacións colocaranse nos espazos escollidos desde primeira hora da mañá. O xurado visitará as figuras ata as 15.00 horas e valorará aspectos como a orixinalidade, a temática ou a elaboración. A entrega de premios realizarase o 14 de febreiro ao remate do desfile.
Pola súa banda, o Concurso de Disfraces reunirá participantes no cruce da Estrada de Saa ás 16.40 horas do día 14. O desfile iniciará ás 17.00 horas e percorrerá varias rúas antes de concluír na área recreativa de Samugueiros. Os premios variarán en función da procedencia e da categoría, con contías que chegan aos 175 euros para carrozas locais. As carrozas non premiadas recibirán un accésit de 40 euros.•
Cargando ...
