O Club Neka de Monforte, campión absoluto galego de Técnica e Freestyle

O Pavillón Polideportivo Municipal de A Pinguela acolleu este sábado a entrega de medallas do Campionato Galego de Técnica e Freestyle de Taekwondo, no que o Club Neka de Monforte se proclamou campión absoluto por terceiro ano consecutivo.
O evento reuniu arredor de 200 deportistas procedentes de toda Galicia, de idades comprendidas entre os 12 anos e as categorías sénior, e permite aos gañadores acceder á Selección Galega e participar en competicións nacionais, como o Campionato de España en Sevilla e o Mundial en Corea. O Concello colaborou coa cesión do pavillón, transporte de tapices e entrega dos trofeos, unha axuda que o director deportivo do Neka, José María Vega, cualificou de fundamental para o bo desenvolvemento do campionato.
O Club Neka presentou 16 taekwondistas: entre cadetes, júnior e sénior, tanto en categoría masculina como feminina, acadando un total de 15 medallas. Entre os recoñecementos individuais, Laura Álvarez foi nomeada Mellor Deportista feminina, e Álex Camba recibiu o galardón en masculino. No apartado de medallas de ouro, destacaron Álex Camba e Laura Álvarez en individuais; en parellas, Álvarez con Dani Areán e Alicia Castro co seu compañeiro de Sada, Hugo Arnoso; e nos tríos, Álex Camba, Carlos Rey e Marco García, Lucía Roca co Tao de Vigo e Alan Bustamante cos compañeiros de Sada. As medallas de prata recaeiron en Alicia Castro en individual e Inés Casal en trío, mentres que os bronces incluíron a Marco García, Daniel Areán, Arón González, Lucía Roca, Inés Casal e Rosa Olmo en tríos.
O evento contou coa presenza do alcalde, José Tomé Roca, acompañado polo concelleiro de Deportes, José Manuel Mougán, e a concelleira de Sanidade, Pilar Espinosa, así como por representantes da Federación Galega de Taekwondo e do ximnasio Neka.
O alcalde destacou o esforzo e a dedicación dos deportistas monfortinos e felicitou ao Neka por manter a súa posición como referente do taekwondo galego, subliñando que o éxito deste club reflicte “o talento, a constancia e o compromiso cos valores deportivos na cidade”.•