O conselleiro de Cultura, Lingua e Xuventude, José López Campos, reuniuse cos alcaldes de Chantada, Manuel Lorenzo Varela, e de Carballeda de Avia, Julio Manuel Yebra‑Pimentel, para analizar o momento actual da candidatura da Ribeira Sacra a Patrimonio Mundial. O encontro produciuse a seis meses da avaliación definitiva, prevista para xullo en Corea do Sur, e permitiu revisar o traballo desenvolvido polos 26 municipios implicados.
Durante a reunión, o conselleiro trasladoulles aos rexedores o contido das conversas mantidas esta semana en París co subdirector de Cultura da Unesco, Ernesto Ottone, e co embaixador de España ante o organismo, Miquel Iceta. Segundo explicou, o obxectivo destes contactos foi “seguir perfilando e ultimando a estratexia para os vindeiros meses”, nun contexto no que percibiu “boas sensacións” arredor da proposta galega.
López Campos destacou que a candidatura pon o foco nunha paisaxe configurada polo uso da auga dun xeito singular, un valor que, segundo indicou, non está suficientemente representado na actual Lista de Patrimonio Mundial. Ademais, a xuntanza serviu para abordar a adaptación da Lei do Patrimonio Cultural, un cambio que permitirá aos concellos axilizar trámites e reforzar a protección dos seus bens.•
Cargando ...
