O Diario Oficial de Galicia recolle a posta en marcha dunha nova liña de axudas da Consellería de Medio Ambiente e Cambio Climático destinada a mellorar instalacións de abastecemento e saneamento de titularidade privada ou comunitaria, cun orzamento total de 700.000 euros. As subvencións diríxense tanto a comunidades de usuarios como a particulares e pretenden contribuír á mellora da calidade da auga e á protección ambiental.
No caso das comunidades de usuarios de abastecemento de auga para consumo humano legalmente constituídas, as achegas permitirán actuar sobre captacións, sistemas de potabilización, depósitos de almacenamento e elementos de control e medición de caudais. Esta liña conta cunha dotación de 500.000 euros e poderá cubrir ata o 80 % do investimento realizado, cun límite máximo de 15.000 euros por solicitude, concedéndose as axudas por orde de entrada ata esgotar o crédito.
A segunda convocatoria está orientada a particulares propietarios de vivendas unifamiliares que precisen renovar instalacións de saneamento. Neste caso, o orzamento ascende a 200.000 euros e financiará actuacións de mellora en foxas sépticas que non acaden niveis mínimos de depuración, cun apoio que pode chegar ao 100 % do custo, ata un máximo de 4.000 euros por vivenda.
O prazo para presentar solicitudes abrirá o vindeiro 16 de febreiro e pechará o 16 de marzo. As comunidades deberán tramitar as peticións de forma electrónica, mentres que os particulares poderán optar tamén pola vía presencial.•
Cargando ...
