Ana Pontón visita unha explotación de vacún en Sarria

A líder do BNG critica os efectos de Altri e do acordo Mercosur e defende o apoio ás explotacións galegas

A portavoz nacional do BNG, Ana Pontón, desprazouse á parroquia de Chorente para visitar unha explotación de vacún, nunha das 28.000 granxas que operan en Galicia. Durante a visita, destacou que estas explotacións son “clave para manter un rural vivo, crean riqueza, emprego e fixan poboación, contribuíndo á conservación do territorio e á prevención de incendios”. Pontón denunciou tamén os impactos negativos que proxectos coma a macrocelulosa Altri poden ter sobre o sector agrogandeiro e o emprego rural, cualificándoa como “un auténtico torpedo para as explotacións das comarcas afectadas”.
Pontón denunciou a opacidade do goberno de Rueda ao manter ocultos acordos co grupo industrial portugués, e sinalou que o BNG presentou un recurso ante o Tribunal Superior de Xustiza de Galicia para ter acceso á documentación. Ademais, alertou sobre os riscos do acordo UE-Mercosur, que sitúa aos produtores galegos nunha competencia desleal fronte a estándares ambientais e sanitarios menos estritos nos países do Mercosur.
No ámbito local, a líder nacionalista participou nun xantar coa militancia e cargos do BNG, entre eles o concelleiro e vicepresidente da Deputación de Lugo, Efrén Castro, e a concelleira Mónica López. Pontón destacou a importancia de manter e estender o modelo municipal de goberno do Bloque, centrado en servizos públicos de calidade, desenvolvemento rural e participación cidadá, e afirmou que a formación afronta o próximo ciclo electoral coa intención de reforzar a súa presenza en Sarria e na comarca.•